Violencia Domestico Print

E problematica di Violencia Domestico no ta nada nobo.
E tendencia di pensa cu esaki cu tin di haber cu “privacy” di otro, ta laga e problema keda te na e porta di cas. “Privacy” no mester ta un e motibo mas pa no actua. Sigur mirando e aumento di maltrato cu ta tuma lugar practicamente tur dia.

Violencia Domestico ta un problema di seguridad social cu mester wordo tuma masha na serio.
Violecia/agresion ta tuma luga den hopi cas. Kizas mas cu por ehempel riba caya. Asina mes media, politiconan y gran parti di nos comunidad ta pone mas atencion riba violencia cu ta tuma luga den publico. Den comparacion cu violencia riba caya, Violencia Domestico ta uno extra menasante, pasobra e ta tuma luga den e seno familiar di e victima. E victima no ta sinti su mes sigur mas den su propio hogar.

E pregunta ta awor, te con leu un gobierno por bay mete den bida priva di su cuidadanonan. E metemento aki ta necesario, mirando e rumbo cu maltrato den e seno familiar ta bayendo. Violencia Domestico mester bira un hecho castigabel, pasobra e ta un menasa, tanto pa e salud como e seguridad di tur esnan envolvi.
Den casonan di Violencia Domestico, nos no ta papia solamente di hende muhe of mucha, sino e por ta tambe hende homber, anciano, personanan cu un of otro limitacion.


Tin diferente forma di Violencia Domestico: fysico, emocional y seksual. E tres formanan aki, hopi biaha ta bin den combinacion cu otro. Ta importante pa no mira otro tiponan di violencia completamente los for di Violencia Domestico. P.e.: negligencia, privacion di derechonan y abuso economico.

E motibonan pakiko Violencia Domestico ta tuma lugar, mester wordo busca den e privacidad hogareño caminda esaki ta sosode. Muchanan cu for di chicito ta (sea testigo of victima) wordo confronta cu violencia, ta core e risico grandi pa ta violento den nan bida adulto y te hasta cay den criminalidad.

 

 En general nos por bisa cu mas estrecho e relacion entre e culpabel y e victima ta, mas intenso e violencia por bira.
Si Violencia Domestico wordo cometi pa un conoci, nos por papia tin biaha di un violencia incidental. Pero si ta trata di un partner of ex-partner di e victima, e ora si den mayoria caso e violencia juist ta di un intensidad halto (frequencia, duracion, daño fysico y otro consequencianan).
Violencia Domestico mester wordu involucra den maneho di Gobierno, Polis y Ministerio Publico. Ta hopi importante pa cuminza duna atencion na e problematica aki.

Hopi energia ta ser hinca den “opvang” y “nazorg”.

Como cu e luna aki ta ser dedica na Violencia Domestico nos ta trece un biaha mas dilanti e importancia di concientisacion (prevencion y señala).

Violencia Domestico ta un problema di nos tur; Gobierno, Polis, Ministerio Publico, Media y comunidad en general, hunto nos por traha na rebaha e casonan. Mihor ainda para e fenomeno brutal aki