Fundacion pa Hende Muhe den Dificultad

Na 1911 “Dia internacional di Hende Muhe” a worde celebra pa prome biaha internacionalmente. Esaki a sosode na: Alemania, Austria, Dinamarca, Swisa y Merca. Hulanda a celebra e dia aki na 1912 pa prome biaha.
Como cu “Dia di Hende Muhe” tawata ser celebra riba diferente fecha den diferente pais, tawata te na aña 1922 cu un fecha fiho a ser escohi, esta 08 maart.

Ta existi diferente storia pa e  scohencia di e fecha 08 maart.
Tin controversia si esaki tawata debi na acontecimentonan na Rusia of Merca.
Tin historia cu ta mustra cu e fecha 08 di maart ta debi na e welga di e obreronan di un fabrica di textiel na New York na aña 1857. Riba 08 maart 1908 tambe caminda un welga a tuma luga pa e obreronan cu a subi caya na Lower East Side di New York pa demonstra contra e.o. orarionan largo di trabao, salario abao y condicionnan malo di trabao.

Ta posibel cu e aclaracion pa e scohencia di e fecha 08 maart a origina den añanan 50. Den e periodo di “Guerra Frieu”, tawata dificil toch pa duna honor na un pais comunista? Tambe por bay na e demostracion y e welga grandi di hende muhenan riba 08 maart 1917 na St. Petersburg.
En todo caso a keda dicidi na 1910 cu anualmente riba e fecha 08 maart lo organisa Dia Internacional di Hende Muhe.

E PROME CONFERENCIA INTERNACIONAL SOCIALISTA DI HENDE MUHE (1907)

Na e “Tweede Internationale” (= esaki ta un organisacion internacional di obreronan socialista cu tawata tin como meta solidaridad internacional) na 1889 na Paris tawata presente Clara Zetkin (1857-1933) cu tawata representante di e partido socialista aleman. Clara tawata manifesta constantemente cu socialismo no por a existi sin e hende muhe, cu hende homber y hende muhe mester lucha hunto pa e derechonan di hende muhe. Na Alemania mes, Clara tawata bringa pa derecho di hende muhe como parti di e lucha di clase social. Como cu Clara no tawata haya oido, e’la tuma e initiativa pa bin cu un movimento di hende muhe socialista.

Pa hopi aña Clara tawata redactora di e corant “Die Gleichheit” socialista aleman pa hende muhe. Clara tawata di pensamento cu internacionalmente tambe e hende muhe mester por influencia e partidonan socialista. Danki na dje cu na aña 1906 hopi hende muhe socialista for di diferente paisnan europeo a bini hunto na Mannheim pa prepara un encuentro internacional. Tur e hende muhenan socialista aki a dicidi hunto pa tene na aña 1907 na Stuttgart un conferencia Internacional di Hende Muhe. Esaki a tuma luga un dia prome cu e encuentro di e “Tweede Internationale”. Na e prome conferencia aki, un resolucion a worde accepta, esta pa entrega e dia siguiente un mocion na e conferencia di “Tweede Internationale”, caminda ta exigi di e partidonan envolvi pa lucha pa derecho di voto di tanto hende homber como hende muhe. E mocion aki a worde accepta.

E DI DOS CONFERENCIA INTERNACIONAL SOCIALISTA DI HENDE MUHE (1910)

Na 1910 a tuma luga na Kopenhagen e di dos conferencia di hende muhe. Como cu den practica tawata parce cu e partidonan socialista no tawata insisti pa e derecho di voto pa hende muhe, mester a busca un otro medio pa involucra mas hende muhe den e lucha aki. Riba proposicion di Clara Zetkin a keda palabra cu cada aña lo tene un Dia Internacional di Hende Muhe, e.o. pa e derecho di voto general pa hende muhe.

Riba e dia aki lo haci propaganda y tene demostracion y reunionan. E secretariado internacional di hende muhe a keda di revela e dia cu a keda escohi - pasobra no tawata tin un fecha fiho ainda – y tambe (pa motibonan tactico) na e partidonan na mando. E gobierno lo jama e dia aki como “Dia di hende muhe”. Y asina a sosode tambe.

TEMPO DI PROME GUERRA MUNDIAL    

Na 1911 e prome Dia International di Hende Muhe a worde celebra na diferente pais.
Na Hulanda esaki a sosode riba 12 di mei 1912 pa prome biaha.

E “Tweede Internationale” a cay den otro pa motibo di e prome Guerra mundial na 1914, pero e organisacion internacional di hende muhe a keda existi. Na 1915 a tuma luga na Swisa un conferencia di hende muhenan for di e paisnan participante den e Guerra cu e meta pa pone fin na e Guerra. Anualmente e Dia di hende muhe a keda existi. Nan Lucha tawata pa paz mundial particularmente.

Na 1916 Clara Zetkin, Rosa Luxemburg y Karl Liebnecht a lanta un bond revolucionario “Spartakus”. Despues di e revolucion na Rusia na aña 1917 e bond aki a culmina den un partido comunista aleman. Clara Zetkin a keda e guia di e secretariado internacional di hende muhe cu na aña 1919 a bay forma parti di e “Derde Communistische Internationale”.

UN FECHA FIHO PA DIA INTERNATIONAL PA HENDE MUHE
Na 1921 e secretariado international di hende muhe a propone pa stipula un fecha fiho pa Dia International di Hende Muhe. E scohencia a cay pa e fecha 08 maart.
Riba 08 maart 1917 bou guia di Alexandra Kollontai  e hende muhenan a lanta masalmente pa protesta contra scarsedad di cuminda y e horrornan di e guerra. Nan welga y demostracionnan a culmina den un welga general di trabao. E desaroyo aki a bira banda di Dia International di Hende Muhe tambe un dia official di fiesta comunista, caminda ta recorda e welga general di trabao como e prome paso  pa revolucion.

Na Hulanda na maart 1912, e prome Dia International di Hende Muhe a worde celebra. Esaki tawata organisa pa e clubnan di hende muhe social democrata. Nan revista “De Proletarische Vrouw” a sali cu un numero special festivo.

Despues di e revolucion Ruso, e band international, en particular e band entre Clara Zetkin y e hende muhenan social democrata a kibra. E dia nacional di hende muhe toch a keda organisa y celebra for di 1920 te cu 1924. Despues di esaki e Dia International di Hende Muhe a worde celebra atrobe pasobra e social democratanan tambe a lanta un organisacion internacional den cual hende muhenan tawata forma parti.

Den e “interbellum” (periodo entre dos Guerra), e hende muhenan social democrata a keda celebra Dia International di Hende Muhe riba fechanan varia.

DIA INTERNATIONAL DI HENDE MUHE DESPUES DI SEGUNDO GUERRA MUNDIAL

Despues di Segundo Guerra mundial e hende muhenan comunista NVB a keda celebra Dia International di Hende Muhe riba 08 maart.
Na 1960 NVB a celebra 50 aña Dia Internacional di Hende Muhe publicando e buki – “Baanbreeksters – Levensgeschiedenissen van strijdbare vrouwen”. Den e buki aki ta recorda e origin di e fecha 08 maart na e welga masal di hende muhenan na e industria di textiel na New York riba 08 maart 1908. Durante e “Tweede feministische golf” na Merca y West Europa  e tradishon di celebra riba dia 08 maart a bolbe worde restableci cu tur honor, basa riba e welga di aña 1908 na New York.

Na comienso di añanan 70 rond Hulanda diferente gruponan di hende muhe ta celebra riba 08 maart Dia Internacional di Hende Muhe. Y cada aña mas hende muhenan migrante tambe ta uni pa celebra esaki. E meta ta pa riba e dia aki conhuntamente e hende muhenan pone na atencion nan lucha. Ta scohe diferente temanan e.o. independencia economico, pobresa, hende muhe migrante of abuso seksual.

Desde 1975 mundialmunte ta celebra riba 08 maart Dia Internacional di Hende Muhe.

Na 1978 e fecha di 08 maart a worde oficialmente reconoci pa Nacionnan Unie.