Stop Violencia Contra Hende Muhe Print

Luna di November ta e luna pa concientisa riba e problema di Violencia, en particular Violencia contra Hende Muhe y Violencia Domestico. Pa e motibo aki  FHMD tur anja na luna di november ta start sali cu su campaña contra maltrato di hende muhe. Ta remarcable e cantidad di noticia cu ta keda publica casi tur dia riba maltrato contra hende muhe.  Esaki ta esnan cu nos a bin sa di nan, pero ta hopi tin cu ta keda scondi. Violencia contra Hende Muhe no conoce distincion di status social /economico, religion, edad, nivel di educacion, rasa/cultura. FHMD ta hopi preocupa cu e aumento di violencia riba nos pais. E tipo di violencia aki ta bira cu dia mas severo.

Nos no mester tapa wowo, orea, ni muchu menos boca y huy e problema aki.  E pensamento cu «no ta mi asunto, ta nan problema »,  ta completamente robes. Tristo pa nos sigui duna lus berde pa keda pensa asina. Un cambio di mentalidad ta den man di cada cuidadano cu di berdad stima su pais y su prohimo. Si nos no para keto den nos mes cas, aki un par di aña ta tur problema ta worde resolvi cu violencia. Nos no mester keda cuidadanonan tolerante mas !


Maltrato entre pareha hoben tambe ta aumenta. E mucha muhe of mucha homber cu ta experencia su “Puppylove”, ta pensa cu ta normal pa grita / ofende y hasta dal pasobra ora di pordona otro, nan ta sinti mas dushi.


Na FHMD nos ta haya cliente cu pa hopi aña ta den un circulo di violencia. Tur tipo di violencia : verbal, emocional, economico, menasa, intimidacion, fisico, seksual, acoso ect. Si nan tin yui, e mayornan aki ta manda e mensahe cu ta o.k. pa maltrata otro.
FHMD tey pa yuda e cliente aki pero ta hopi mas importante inverti den prevencion.


Dia 24 di november nos fundacion ta cumpli 15 aña di existencia y dia 25 november ta e dia cu nos ta conmemora e dia cu Internacionalmente ta reconoci como « Dia Internacional pa Eliminacion di Violencia contra Hende Muhe ».
Durante luna di November 2010 ta bai tin varios actividat di concientisacion cu lo worde publica den corantnan y na television dunando informacion tocante actividadnan cu lo worde teni en conneccion cu e fecha importante aki.


«     E RAIS PA PAS TA ELIMINA TUR VIOLENCIA DEN NOS CAS    »  
      ≈   DUN’MAN :  STOP VIOLENCIA CONTRA HENDE MUHE     ≈